«Եթե ոտնահարում են քո իրավունքները, պետք է դուրս գաս ու պայքարես». Հովհաննես Ղազարյան՝ համակարգչային մասնագետ
05.11.2018
15:23
6 ամիս անազատության մեջ գտնված, սակայն արդարադատության հասած Հովհաննեսը պատմում է իր նկատմամբ ճնշումների, բռնությունների և իր համառ պայքարի մասին:

«Ազատությունից զրկված մարդը կյանքի հույսը կորցրած մարդ է, որը չգիտի` երբ է դուրս գալու և իր ապագան ինչ է լինելու:
Սկզբում ես շատ էի մտածում, չէի հասկանում ինչքան ժամանակ կմնամ բանտում: Նուբարաշենի ՔԿՀ-ում խցերի վիճակը շատ վատ էր, պատերը բորբոսնած, խավարասերներ ու փայտոջիլներ, նույնիսկ կարիճներ էին մտնում մեր խուց: Այդ 4 պատերի մեջ օդը շատ ծանր էր, երբեմն 14 հոգով էինք մնում խցում, որտեղ նախատեսված էր առավելագույնը 12 դատաապարտյալի համար անկողին:
 
Բանտում հայտնվել էի 2016թ.-ին «Սասնա ծռերի» կողմից Ոստիկանութան ՊՊԾ գունդը գրավելուց և դրան հաջորդած իրադարձություններից հետո: Այդ օրերին ես ակտիվ մասնակցում էի ցույցերին, որի ժամանակ էլ ինձ բերման ենթարկեցին, այնուհետև կալանքի տակ պահեցին 6 ամիս 14 օր: Ինձ մեղադրում էին ոստիկանների վրա քար շպրտելու, հարվածելու մեջ, բայց ես գիտեի, որ անմեղ եմ ու խիղճս հանգիստ էր:
 
Ես քաղաքացիական անհնազանդություն դրսևորել եմ դեռ 2013 թ.-ին` պայքարելով կեղծված նախագահական ընտրությունների դեմ: Ուսանող էի, ակտիվ մասնակցում էի դասադուլներին, որի հետևանքով էլ ուսումս կիսատ մնաց, ու ես դուրս մնացի Ինֆորմատիկայի պետական քոլեջից: Բայց ինձ համար ավելի կարևոր էր իմ քայլով իրավիճակ փոխել Հայաստանում՝ վերականգնել արդարությունը, բարելավել սոցիալական վիճակը, փողոցով քայլող մարդկանց դեմքին ժպիտ տեսնել:
 
Դասադուլների ժամանակ կյանքում առաջին անգամ բերման ենթարկվեցի: Հիշում եմ Ոստիկանության բաժանմունքում վախ ու անհանգստություն ունեի, ինձ թվում էր տանելու են փակեն բանտում 2 տարով: Իմ իրավունքները բացարձակ չգիտեի: Ինձ փորձում էին հոգեբանական ճնշումների ենթարկել, վախեցնել, համոզում էին դուրս չգալ փողոցային պայքարի, բայց միևնույն է, դրանից հետո բազմաթիվ քաղաքացիական շարժումների եմ մասնակցել ու բազմիցս ենթարկվել ոստիկանների կողմից բռնության, ծեծի ու հոգեբանական ճնշումների:
Ազատազրկվելուց հետո նույնպես հույսս չէի կորցնում:
 
Սկսեցի շատ գրքեր կարդալ քրեակատարողական հիմնարկում, հայ և ռուս գրականություն: Նույնիսկ 6 օր հացադուլի եմ նստել իմ ազատ արձակման պահանջով:
 
Ես գիտեի, որ իմ գործը սարքած է ու այդ առումով հանգիստ էի, ինձ մեղավոր չէի ճանաչում: Հացադուլը օգնեց, իմ կալանավորումից 6 ամիս անց՝ 2017 թ. փետրվարին, դատարանը որոշեց ազատ արձակել ինձ, իսկ «թավշյա հեղափոխությունից» հետո ընդհանրապես գործը կարճվեց: Ես ինձ ազատ մարդ եմ զգացել իմ ամբողջ կյանքում ու շարունակում եմ հիմա էլ այդպես զգալ:
 
Մարդու ազատությունն ու արժանապատվությունը ինձ համար ամենակարևոր արժեքներն են:
Եթե ես տեսնեմ, որ շարունակում են ոտնահարել մարդկանց ազատությունն ու արժանապատվությունը, էլի իմ ընկերների հետ դուրս կգամ փողոց պայքարելու:
 
Արդարությունը մարդկանց հավասարությունն է օրենքի առջև: Դա քաղաքացիական գիտակցություն է,ու եթե ինչ որ մեկը ոտնահարում է քո իրավունքները, նա քեզնից ավելի բարձր չի: Բայց եթե ոտնահարում է, պետք է դուրս գաս ու պայքարես միշտ»:
Print Friendly and PDF
Այլ մամլո հաղորդագրություններ
«Ինչպե՞ս ստեղծել որակյալ սոցիալական ծառայություններ Հայաստանում և պայքարել աղքատության դեմ»
19.03.2019
12:00
Մարտի 19-ին «Մեդիա կենտրոնում» տեղի ունեցավ մամուլի ասուլիս` նվիրված Սոցիալական աշխատանքի համաշխարհային օրվան: Ասուլիսի թեման էր` «Ինչպե՞ս ստեղծել որակյալ սոցիալական ծառայություններ Հայաստանում և պայքարել աղքատության դեմ»:
«Մեդիա սպառումն ու ինֆորմացիոն նախասիրությունները Հայաստանում-2019» հետազոտության ներկայացում
15.03.2019
12:00
Մարտի 15-ին «Մեդիա կենտրոնում» տեղի ունեցավ «Մեդիա սպառումն ու ինֆորմացիոն նախասիրությունները Հայաստանում- 2019» հետազոտության արդյունքների ներկայացում:
Խաղաղության ընկալումը․ ԼՂ հակամարտության մոտեցումների վերլուծությունը
06.02.2019
12:00
ԼՂ հակամարտության հանգուցալուծմանը հասնելու միակ ճանապարհը խաղաղությանը նախապատրաստվելն է: Թեպետ հակամարտող հանրույթներում գերիշխում է պատերազմի պրոպագանդան, սակայն Հայաստանում, Լեռնային Ղարաբաղում եւ Ադրբեջանում մարդիկ սկսել են ավելի ու ավելի քննադատաբար մոտենալ հնարավոր պատերազմին: Հարցեր են հնչեցնում պատերազմի ու խաղաղության գնի մասին:
2017-2018թթ պետգնումների համակարգի մոնիտորինգի արդյունքները
28.12.2018
12:00
Դեկտեմբերի 28-ին «Մեդիա կենտրոնում» «Հանրային քաղաքականության հետազոտությունների ազգային կենտրոն» ՀԿ-ն ներկայացրեց 2017-2018թթ (I կիսամյակի) պետական գնումների համակարգի հիմնական միտումները։
Իրավապաշտպանների առաջարկները ՔԿՀ-ներում բարեփոխումների իրականացման ռազմավարության վերաբերյալ
27.12.2018
13:30
Արդարադատության նախարարության կողմից е-draft կայքում 2018 թ. դեկտեմբերի 19-ից հանրային քննարկման է դրվել քրեակատարողական համակարգում իրավիճակի բարելավման նպատակով 2018 -2038 թթ. ռազմավարությունը և դրա իրականացման 20 -ամյա միջոցառումների ծրագիրը հաստատելու մասին կառավարության որոշման նախագիծը։ Այն հանրային քննարկման է դրված լինելու մինչև 2019 թ. հունվարի 8-ը։
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Տեսանյութեր
Մամլո հաղորդագրություն
Հայաստան-Թուրքիա Միջոցառումներ