«Ազատազրկման դատավճիռ Ժիրայր Սեֆիլյանի և այլոց նկատմամբ. իրավապաշտպանների գնահատականը»
21.03.2018
13:00
Մարտի 20-ին Շենգավիթ վարչական շրջանի ընդհանուր իրավասության դատարանի դատավոր Տաթևիկ Գրիգորյանը հրապարակեց ծանր հանցագործությունների մեջ մեղադրվող Ժիրայր Սեֆիլյանի, Գևորգ Սաֆարյանի և մյուսների գործով դատավճիռները:

Ժիրայր Սեֆիլյանը դատապարտվեց 10 տարի 5 ամիս ազատազրկման, Գևորգ Սաֆարյանը՝ 4, միասնական պատիժը՝ 5,5 տարի, Սասունիկ Կիրակոսյանը՝ 4,6 տարի, Ներսես Պողոսյանը՝ 3,6 տարի, Հրայր Թոփչյանը՝ 3, Գալուստ Գրիգորյանը՝ 3.5 տարի, Հովհաննես Պետրոսյանը՝ 2 տարի ժամկետով:

Մարտի 21-ին «Մեդիա կենտրոնում» «Ազատազրկման դատավճիռ Ժիրայր Սեֆիլյանի և այլոց նկատմամբ. իրավապաշտպանների գնահատականը» թեմայով քննարկման ընթացքում Ժիրայր Սեֆիլյանի փաստաբան Արայիկ Պապիկյանը, գնահատելով այդ դատավճիռները, նշեց, որ այդ օրը օրացույցում պետք է նշել որպես արդարադատության սև օր ։ Այնուհետև փաստաբանը գնահատականներ հնչեցրեց վերոհիշյալ դատական ակտի վերաբերյալ․

«Զուտ իրավաբանական առումով դատավճիռը որևէ իրավական գնահատականի արժանի չէ, որովհետև այն չի բխում իրավունքից ու արդարադատությունից։ Քաղաքական հարցեր լուծելու համար օգտագործվում է արդարադատական համակարգը»,- ասաց փաստաբանը՝ հավելելով․ «Առհասարակ Հայաստանի յուրաքանչյուր ազատամիտ քաղաքացի  ստացավ անուղղակի մեսիջը առ այն, որ եթե մեր իշխանության դեմ դուք կփորձեք բարձրաձայնել, հրապարակային ելույթներ ունենալ, խնդիրները վեր հանել, ապա քաղաքական իշխանությունը լուծման ձևերը գիտի, դատարանը կօգտագործի այդ նպատակով ու շատ երկարատև ազատազրկումով ձեզ կլռեցնի»:

Արայիկ Պապիկյանը համոզմունք հայտնեց, որ արդարադատական համակարգի ճգնաժամը կարելի է հաղթահարել բացառապես քաղաքական փոփոխությունների միջոցով։

Ժիրայր Սեֆիլյանի մյուս փաստաբան Տիգրան Հայրապետյանը, անդրադառնալով դատարանի կողմից Ժիրայր Սեֆիլյանի նկատմամբ կիրառված պատժաչափին, նշեց, որ այդպիսի պատժաչափ կիրառվում է զուտ այն բանի համար, որ մարդկանց մոտ կասկածներ առաջանան․ «Սուտը ինչքան շատ ու հաճախակի է լինում, այդքան մեծ հավանականություն կա, որ  մարդիկ կհավատան։ Պատժաչափը հենց այդ սկզբունքով է կիրառվել։ Էս երկու օրը մտածել եմ, որ եթե մենք էդքան չապացուցեինք, որ ակնհայտ անհեթեթ է մեղադրանքը, միգուցե էդքան խիստ չլիներ պատիժը։ Բայց որ մենք կարողացանք հիմնավորել, որ ընդհանրապես բան չկա, իրենք դրանից ավելի վրդովվեցին ու խստացրին վճիռը»։ Փաստաբանի կարծիքով՝ դատաիրավական համակարգը, նման կոպիտ ձևով քաղաքական պատվեր կատարելով, ազդակ հղեց ամբողջ համակարգին․ «Բոլոր մարմիններին մեսիջ հասավ, որ եթե պատվիրատուն ամենաբարձր մակարդակում է, որևէ մեկը պատվեր կատարելուց խնդիր չի ունենա։ Փաստորեն այդ օրը իրավաբանությունը թաղվեց»։ Հայաստանի Հելսինկյան կոմիտեի նախագահ Ավետիք Իշխանյանը, խոսելով կիրառված պատիժներից,  նշեց, որ «արդեն անհարմար է զգում, որ այս երկրում է ապրում»։ «Այս գործերը, նույնը Սամվել Բաբայանի գործը, հիշեցնում է 37 թվականը։  Այն ժամանակ հենց այնպես, առանց որևէ մեղքի մեղադրանք էին առաջադրում։ Աճառյանին մեղադրում էին, որ նա եղել է Թուրքիայի, Անգլիայի․․․ լրտեսը։ Այս դատավարությունը ինձ համար հենց այս պատճառով է շոկ, քան մյուս դատավարությունները»։

Անդրադառնալով հանրային ընկալումներին՝ իրավապշտպանը նշեց, որ միշտ կգտնվեն մարդիկ, ովքեր կհավատան, որ ամեն դեպքում մեղադրվողը ինչ-որ հանցանք կատարել է․

«Հասարակության մեջ մինչև հիմա հավատացողներ կան, որ անցած դարի 30-ականներին դատապարտվածները  ինչ-որ մի բան արել են։ Մարդկանց մտքով անգամ չի անցնում, որ մարդուն կարող է հենց էնպես տեղը բռնեն տանեն և 10 տարի տան։ Սա այդ դեպքն է»։

Դերենիկ Մալխասյան, Մեդիա կենտրոն ծրագրի խմբագիր/համակարգող:

Հեղինակի հետ կապվելու համար գրեք derenikmalkhasian@gmail.com էլփոստին:

 

Տեսանյութ
Print Friendly and PDF
Այլ մամլո հաղորդագրություններ
«Ինչպե՞ս ստեղծել որակյալ սոցիալական ծառայություններ Հայաստանում և պայքարել աղքատության դեմ»
19.03.2019
12:00
Մարտի 19-ին «Մեդիա կենտրոնում» տեղի ունեցավ մամուլի ասուլիս` նվիրված Սոցիալական աշխատանքի համաշխարհային օրվան: Ասուլիսի թեման էր` «Ինչպե՞ս ստեղծել որակյալ սոցիալական ծառայություններ Հայաստանում և պայքարել աղքատության դեմ»:
«Մեդիա սպառումն ու ինֆորմացիոն նախասիրությունները Հայաստանում-2019» հետազոտության ներկայացում
15.03.2019
12:00
Մարտի 15-ին «Մեդիա կենտրոնում» տեղի ունեցավ «Մեդիա սպառումն ու ինֆորմացիոն նախասիրությունները Հայաստանում- 2019» հետազոտության արդյունքների ներկայացում:
Խաղաղության ընկալումը․ ԼՂ հակամարտության մոտեցումների վերլուծությունը
06.02.2019
12:00
ԼՂ հակամարտության հանգուցալուծմանը հասնելու միակ ճանապարհը խաղաղությանը նախապատրաստվելն է: Թեպետ հակամարտող հանրույթներում գերիշխում է պատերազմի պրոպագանդան, սակայն Հայաստանում, Լեռնային Ղարաբաղում եւ Ադրբեջանում մարդիկ սկսել են ավելի ու ավելի քննադատաբար մոտենալ հնարավոր պատերազմին: Հարցեր են հնչեցնում պատերազմի ու խաղաղության գնի մասին:
2017-2018թթ պետգնումների համակարգի մոնիտորինգի արդյունքները
28.12.2018
12:00
Դեկտեմբերի 28-ին «Մեդիա կենտրոնում» «Հանրային քաղաքականության հետազոտությունների ազգային կենտրոն» ՀԿ-ն ներկայացրեց 2017-2018թթ (I կիսամյակի) պետական գնումների համակարգի հիմնական միտումները։
Իրավապաշտպանների առաջարկները ՔԿՀ-ներում բարեփոխումների իրականացման ռազմավարության վերաբերյալ
27.12.2018
13:30
Արդարադատության նախարարության կողմից е-draft կայքում 2018 թ. դեկտեմբերի 19-ից հանրային քննարկման է դրվել քրեակատարողական համակարգում իրավիճակի բարելավման նպատակով 2018 -2038 թթ. ռազմավարությունը և դրա իրականացման 20 -ամյա միջոցառումների ծրագիրը հաստատելու մասին կառավարության որոշման նախագիծը։ Այն հանրային քննարկման է դրված լինելու մինչև 2019 թ. հունվարի 8-ը։
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Տեսանյութեր
Մամլո հաղորդագրություն
Հայաստան-Թուրքիա Միջոցառումներ