«ԱՄՆ սանկցիաների հնարավոր ազդեցությունը Հայաստանի վրա Ռուսաստանի հետ ռազմական գործարքներ կնքելու հարցում»
14.02.2018
12:00
Երեւանում ԱՄՆ-ի դեսպանատունը չի հերքում, որ Ռուսաստանի ռազմաարդյունաբերական համալիրի ընկերությունների հետ «էական գործարքների» կնքման պարագայում Հայաստանը կամ որեւէ այլ երկիր կարող է հայտնվել նոր սահմանված պատժամիջոցների թիրախում:

Նման ռիսկեր տեսնում են նաեւ Հայաստանի կառավարությունում, քանի որ Ռուսաստանը հայկական բանակի սպառազինության հիմնական մատակարարն է:

Փորձագետները, սակայն այլ կարծիքի են: Հայաստանի պարագայում այդ պատժամիջոցների կիրառման վտանգը մեծ չէ, նշում են նրանք «Մեդիա կենտրոնում» փետրվարի 14-ին հրավիրած «ԱՄՆ սանկցիաների հնարավոր ազդեցությունը Հայաստանի վրա Ռուսաստանի հետ ռազմական գործարքներ կնքելու հարցում» թեմայով քննարկման ժամանակ:

Մամուլից հայտնի դարձավ, ԱՄՆ-ն ծանուցել է Հայաստանի կամ որեւէ այլ երկրի կառավարությանը Ռուսաստանի ռազմաարդյունաբերական համալիրի ընկերությունների հետ «էական գործարքների» կնքման պարագայում հնարավոր պատժամիջոցների թիրախում հայտնվելու վտանգի մասին: Տեղի է ունեցել միայն ծանուցում, բայց ոչ քննարկում: Այս մասին «Հայկական ժամանակ» թերթի հարցմանն ի պատասխան հայտնել են Երեւանում Ամերիկայի Միացյալ Նահանգների դեսպանատնից:

Նոր պատժամիջոցներ կիրառելու հնարավորությունը ԱՄՆ նախագահին ընձեռել է Կոնգրեսը CAATSA («Պատժամիջոցների միջոցով Ամերիկայի հակառակորդներին հակազդելու մասին») օրենքով, որը ստորագրել է Դոնալդ Թրամփն անցյալ տարվա օգոստոսի 2-ին։ Ինչպես հայտնում է РБК-ն, ամերիկյան իշխանությունները հաստատել են, որ նոր պատժամիջոցների թիրախում կարող են հայտնվել ռուսական զենքի արտահանումները։

Ավելի վաղ հայտնի դարձավ, որ այս տարվա հունվարի 29-ից ԱՄՆ նախագահը կարող է նոր պատժամիջոցներ կիրառել աշխարհի յուրաքանչյուր պետության ֆիզիկական անձանց, կազմակերպությունների կամ ընկերությունների դեմ, որոնք «էական» ծավալի ռազմական գործարքներ կկնքեն Ռուսաստանի ռազմաարդյունաբերական համալիրի ձեռնարկությունների հետ։ Այդ ցանկում են հայտնվել ռուսական պաշտպանական 39 ձեռնարկություն եւ հետախուզական կառույց։

Ցանկի կեսը զբաղեցնում են «Ростех» ընկերության կազմում ընդգրկված ձեռնարկությունները, այդ թվում՝ սպառազինությունների ներկրման եւ արտահանման պետական մոնոպոլիստ «Рособоронэкспорт»-ը։ Ցուցակում են ընդգրկված նաեւ Ռուսաստանի դաշնային անվտանգության ծառայությունը, Արտաքին հետախուզության ծառայությունը եւ ԶՈւ-ի Գենշտաբի գլխավոր վարչությունը։

Հատկանշական է, որ միմյանց հետ հակամարտող Հայաստանն ու Ադրբեջանը ռուսական սպառազինության գնորդներից են։ Վերջին մի քանի տարում Ադրբեջանը շուրջ 5 մլրդ դոլարի ռազմական գործարք է կնքել ռուսական ձեռնարկությունների հետ, իսկ Հայաստանը ՀԱՊԿ-ի շրջանակում ստանում է ռուսական արտադրության սպառազինություն ներքին գներով։ ՀՀ-ը վերջին երկու տարում ՌԴ-ից շուրջ 250 մլն դոլարի ռազմական վարկ ստացավ այդ երկրի արտադրության նորագույն զինատեսակներ ձեռք բերելու համար։

Բացի այդ, համաձայն 2010 թ-ի Հայաստանի ու Ռուսաստանի միջեւ Գյումրիում տեղակայված 102-րդ ռազմաբազայի մասին պայմանագրին կից կնքած հատուկ արձանագրության, որով բազայի տեղակայման ժամկետը երկարաձգվեց մինչեւ 2044 թ.-ը, Մոսկվան ոչ միայն իր վրա է վերցնում ՀՀ ողջ տարածքի անվտանգության ապահովման խնդիրը, այլեւ պարտավորվում է հայկական բանակն ապահովել ժամանակակից սպառազինությամբ:

Բացի այդ Հայաստանն ու ՌԴ-ն տարիներ առաջ ստորագրել են ռազմատեխնիկական ոլորտում համագործակցության պայմանագիր, համաձայն որի Հայաստանն իրավունք է ստացել Ռուսաստանի ռազմաարդյունաբերական համալիրի ձեռնարկություններից ուղիղ գնումներ կատարել՝ շրջանցելով պետական մոնոպոլիստ «Рособоронэкспорт»-ի բյուրոկրատտիան:

Ես, անկեղծ ասած, չեմ կարծում, որ այդ սանկցիաներն այս դեպքում ուղղված էին Ռուսաստանի Դաշնության դեմ, նկատի ունենալով, որ այնտեղ Հայաստանն է, ես չեմ տեսնում նույնիսկ կապ Հայաստանի հետ: Այս մասին «Մեդիա կենտրոնում» հրավիրած քննարկմանը հայտարարեց Գլոբալիզացիայի և տարածաշրջանային հետազոտությունների վերլուծական կենտրոնի նախագահ, քաղաքագետ Ստեփան Գրիգորյանը: 

Նրա խոսքով, Հայաստանը, իհարկե, պետք է մտածի՝ ինչպես կարող են դրանք անդրադառնալ իր և Ռուսաստանի համագործակցության վրա, բայց, մյուս կողմից՝ «մենք Ռուսաստանի հետ հավաքական անվտանգության պայմանագիր ունենք, դա ինչ-որ անլեգալ համագործակցություն չէ, և չեմ կարծում, թե այդ մասին չգիտի ԱՄՆ-ը»: «Իհարկե, գիտի: Այսինքն՝ դա բաց համագործակցություն է, պաշտոնական համագործակցություն, մենք համագործակցում ենք նաև ՆԱՏՕ-ի հետ, այստեղ ճիշտ կլինի ասել՝ փորձում ենք այդ քաղաքականությունը լրացնել, այդ իսկ պատճառով, ես, անկեղծ ասած, չեմ կարծում, որ այդ սանկցիաների հարցը  գերակտուալ խնդիր է»,- կարծում է Ստեփան Գրիգորյանը:

Նրա դիտարկմամբ՝ դրանք կիրառվելու են այս կամ այն աստիճանով, մի մասը կարող է ընդհանրապես չկիրառվել:  Ըստ  քաղաքագետի՝ պետք չէ այդ սանկցիաները Հայաստանի հետ կապել և կարևոր հարց համարել:

Ռազմական փորձագետ Կարեն Վրթանեսյանը իր հերթին նշեց, որ հաշվի առնելով ԱՄՆ և ՌԴ լարված հարաբերությունները՝ անկախ պատժամիջոցներից, Հայաստանը ԱՄՆ-ի կողմից որոշ սանկցիաների պետք է սպասել ամեն պահի: «Սակայն այժմ այս սցենարն այդքան էլ հավանական չէ», - ասաց փորագետը: Նրա խոսքով՝ մյուս կողմից ԱՄՆ-Ադրբեջան հարաբերությունների մասին նույնը չի կարելի ասել. «Իհարկե որոշակի լարվածություն կա ԱՄՆ-Ադրբեջան հարաբերություններում, հատկապես, մարդու իրավունքների և խոսքի ազատության հարցում, բայց բիզնես մակարդակում նրանց հարաբերությունները լավ են. դժվար թե ԱՄՆ-ն սանկցիաներ կիրառի Ալիևի ռեժիմի դեմ»:

Նման սցենարը քիչ հավանական է համարում նաեւ ԱՊՀ երկրների Կովկասի բաժնի վարիչ, ռուս ռազմական փորձագետ Վլադիմիր Եվսեևը, որը քննարկմանը միացել էր Մոսկվայից տեսազանգի միջոցով: «Հավանական չեմ համարում, որ ԱՄՆ-ն Հայաստանի նկատմամբ պատժամիջոցներ սահմանի Ռուսաստանի ռազմաարդյունաբերական համալիրի ընկերությունների հետ «էական գործարքներ» կնքելու պատճառով», - ասաց նա ու հավելեց, որ Հայաստանի կառավարությանը տրված ծանուցումը նման հավանականության մասին քաղաքական ճնշում է պաշտոնական Երևանի վրա:

«Անկեղծ ասած, ես չեմ հասկանում անգամ, թե ինչու է ԱՄՆ-ն քաղաքական ճնշում գործադրում Հայաստանի վրա, այն դեպքում, երբ անկասկած, ԱՄՆ-ն ուզում է վերահսկողություն ունենալ այս տարածաշրջանի, այդ թվում՝ Հայաստանի վրա: Բայց եթե նրանք պատժամիջոցներ սահմանեն Հայաստանի նկատմամբ, այդպիսով Հայաստանը կհեռանա նրանցից, ոչ թե կմոտենա, իսկ Միացյալ Նահանգները չեն ուզի, որ Հայաստանը հեռանա իրենից»,- շեշտեց Վլադիմիր Եվսեևը:

Արշալույս Մղդեսյան, «Մեդիա կենտրոն» ծրագրի համակարգող-խմբագիր

Հեղինակի հետ կապվելու համար գրեք arshaluismghdesyan@pjc.am հասցեին:

Տեսանյութ
Print Friendly and PDF
Այլ մամլո հաղորդագրություններ
«Հեպատիտների տարածվածության, դեղերի և բուժման հասանելիության խնդիրները Հայաստանում»
16.08.2018
12:00
2017-2018 թթ. «Դրական մարդկանց հայկական ցանց» սոցիալական ՀԿ-ն իրականացրել է հետազոտություն Երևան, Գյումրի, Վանաձոր, Հրազդան, Սևան, Գավառ, Մարտունի և Արմավիր քաղաքներում`ուղղված բնակչության շրջանում վիրուսային հեպատիտներ B-ի և C-ի վաղ հայտնաբերմանը, խնդրի մասին քաղաքացիների շրջանում իրազեկության բարձրացմանը:
«ՀՀ պետական ֆինանսների կառավարման համակարգի 2017-2018թթ. մոնիտորինգի արդյունքները»
27.07.2018
12:30
Հուլիսի 27-ին «Մեդիա կենտրոնում» տեղի ունեցավ մամուլի ասուլիս «ՀՀ պետական ֆինանսների կառավարման համակարգի 2017-2018թթ. մոնիտորինգի արդյունքները» թեմայով։
Պաշտպանական ոլորտի պետգնումները կոռուպցիոն մեծ ռիսկեր են պարունակում՝ փորձագետ
26.07.2018
14:00
Հուլիսի 26-ին «Մեդիա կենտրոնում» Հանրային քաղաքականության հետազոտությունների ազգային կենտրոնի նախագահ, տնտեսագետ Արտակ Մանուկյանը ներկայացրեց ՀՔՀԱԿ-ի կողմից իրականացված 2017-2018 թթ. պաշտպանական ոլորտի գնումների մոնիտորինգի արդյունքները։
«Մեդիա-նոր իշխանություններ. մտահոգիչ միտումներ»
25.07.2018
12:00
Մանիպուլյացիա, քարոզչություն, ապատեղեկատվություն, կեղծ կայքեր..Այս ամենը մեդիայում եղել է միշտ: Սակայն մասշտաբները, որոնք տեսնում ենք այսօր, մեդիա փորձագետներին թույլ է տալիս վիճակը գնահատել՝ իբրև ճգնաժամային:

«Դիտորդների խմբի գործունեության խոչընդոտները և ՔԿՀ-ներում մարդու իրավունքների խախտումների ընթացիկ խնդիրները»
25.07.2018
11:00
Թավշյա հեղափոխությունից հետո ՀՀ Արդարադատության նախարարությունը պահում է նույն դիրքորոշումը և նույն կերպ խոչընդոտում ՀՀ ԱՆ ՔԿՀ-ներում հասարակական վերահսկողություն իրականացնող հասարակական Դիտորդների խմբի գործունեությունը. այս մասին հուլիսի 25-ին Մեդիա կենտրոնում տեղի ունեցած քննարկմանը հայտարարեցին Դիտորդական խմբի անդամները:
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Տեսանյութեր
Հայաստան-Թուրքիա Միջոցառումներ