«Ազատազրկվածների պահման պայմանները ՔԿՀ-ներում. չլուծված խնդիրնե՞ ր, թե՞ բարեփոխումներ»
19.01.2018
11:00
Ազատազրկվածների պահման պայմանները և խնդիրները ՔԿՀ-ներում մնացել են անփոփոխ՝ նախորդ տարիների համեմատ. այս մասին հունվարի 19-ին «Մեդիա կենտրոնում» տեղի ունեցած քննարկմանը ասաց ՀՀ ԱՆ ՔԿՀ-ներում հասարակական վերահսկողություն իրականացնող հասարակական դիտորդների խմբի անդամ Ռոբերտ Ռևազյանը:

«Մասնավորապես` շատ լուրջ է Նուբարաշեն ՔԿՀ-ի գերբնակեցման խնդիրը: 8 հոգու համար սահմանված խցերում ապրում է 15 մարդ, իսկ հիմնարկի առաջին հարկն ընդհանրապես բնակեցման համար պիտանի չէ:  Խոնավ, կիսանկուղային հարկաբաժին է, ցուրտ, բորբոսնած պատերով, ուր ինչ միջատ ասես՝ կարող է լինել։ ՔԿՀ-ում կան խցեր, որոնք շատ անմխիթար են, կան նաեւ շատ լավ վերանորոգված խցեր, որոնք արվում են հենց կալանավորների միջոցներով»,-ասում է Ռևազյանը:

Ըստ բանախոսի՝ պետությունը պետք է պարտավորվի բոլոր խցերը բերել միանման, բարեկարգ տեսքի:

«Քրեակատարողական հիմնակներում թիվ մեկ խնդիր են նաև հիերարխիկ հարաբերությունները, որոնց դեմ, սակայն, պայքար չի տարվում։ Կարծում եմ՝ վաղուց ժամանակն է այդ հարաբերությունները վերացնելու ուղղությամբ հայեցակարգ մշակել»,- ասաց նա։

ՀՀ ԱՆ Քրեակատարողական վարչության իրավաբանական բաժնի պետի տեղակալ, արդարադատության փոխգնդապետ Տիգրան Սահակյանը եւս չհերքեց ՔԿՀ-ի գերբնակեցման եւ ոչ բարվոք պայմանների հարցը:

«2009-ին որոշում է կայացվել ենթակառուցվածքային բարեփոխումներ իրականացվելու, սակայն մեր ֆինանսական վիճակը թույլ չի տալիս դա իրականացնել 1 կամ 2 տարվա ընթացքում: Խնդրի լուծման նպատակով վեջին տարիներին կառուցվեց «Արմավիր» ՔԿՀ-ն, ինչը թեթևացրեց գերբեռնվածությունը։ Բարեփոխումների ծրագրի ամբողջական իրականացման արդյունքում հետագայում մենք ունենալու ենք միջազգային չափորոշիչներին համապատասխան այլ ՔԿՀ-ներ ևս։ Առաջիկայում նախատեսվում է նոր ՔԿՀ կառուցել Գորիսում»,-ասաց Սահակյանը:

ՀՀ ԱՆ ՔԿՀ-ներում հասարակական վերահսկողություն իրականացնող հասարակական դիտորդների խմբի անդամ Զառա Հովհաննիսյանը անդրադարձավ ՔԿՀ-ներում բուժսպասարկման խնդիրներին և նշեց, որ առողջական խնդիրների չլուծված լինելը հանգեցնում է մահվան դեպքերի, հիշեցնելով  մասնավորապես «Հաց Բերող» Արթուր Սարգսյանի մահվան դեպքը:

«Տարվա վերջին մենք այցելեցինք նաև Աբովյանում գտնվող կանանց ՔԿՀ։ Այնտեղ երկու լուրջ դեպքի հանդիպեցինք։  Հիվանդ դատապարտյալ կանայք, առհասարակ, խնամողներ չունեն, նրանց խնամքը ստանձնում էին առողջ դատապարտյալները, մինչդեռ ՔԿՀ-ները պետք է կարողանան պատշաճ բժշկական օգնություն ցուցաբերել դատապարտյալներին: Այս մասին ահազանգել ենք Արդարադատության նախարարություն եւ ստացել մերժողական պատասխան: Արդյունքում՝ կանանցից մեկը մահացավ, իսկ մյուսը գտնվում է վերակենդանացման բաժանմունքում: Այս դեպքերը ՔԿՀ-ի եւ ԱՆ-ն ուսերին է»,- ասաց Հովհաննիսյանը:

Ռոբերտ Ռևազյանը նշում է, որ  եթե պետությունը չի կարող բուժել ծանր հիվանդությամբ դատապարտյալի, պետք է նրան ազատ արձակի բուժում ստանալու համար, այլ ոչ թե սպասի նրա վախճանին:

Փոխգնդապետ Տիգրան Սահակյանը հակադարձեց` նշելով, որ 2017 թվականին 1740 կալանավորներ և դատապարտյալներ տեղափոխվել են քաղաքացիական հիվանդանոցներ, քանի որ ՔԿՀ-ներում իրենց բուժումը արդյունավետ չէր:

Սահակյանը չհամաձայնեց նաև այն տեսակետի հետ, որ ազատազրկվածների հիվանդությունները շատ հաճախ կապվում են պահման պայմանների կամ բուժաննակազմի անհետևողականության հետ։

Ինչ վերաբերում է ՔԿՀ-ներում սննդի որակին, ապա Ռոբերտ  Ռևազյանի խոսքով, այստեղ ևս հեղափոխական տարբերություն, լավացում առկա չէ։

«Եթե մեկ-երկու շաբաթ ՔԿՀ-ներ հանձնունք մտցնելն արգելվի, բունտ կբարձրանա։ Նման բան հնարավոր կլինի միայն որակյալ բանտային սննդի ապահովման դեպքում»,- ասաց նա։

Փոխգնդապետ Տիգրան Սահակյանն իր հերթին նկատեց, որ գոնե մեկ տարի պետք է անցնի՝ հասկանալու խնդրի դրական միտումներն ու բացերը։

«Սննդի որակի հետ կապված որևէ բողոք, սակայն չի ստացվել։ ՔԿՀ-ներ հանձնունքներ տանելը կապված են մեր ազգային մենթալիտետի հետ։ Միգուցե օրենքով արգելելը բերի ավելի վատ հետևանքների։ Ամեն դեպքում հանձնունքներ բերելը չեմ ուզում կապել սննդի վատ որակի հետ»,- ամփոփեց Սահակյանը։

Լիլիթ Առաքելյան, Մեդիա կենտրոն ծրագրի խմբագիր/համակարգող:

Հեղինակի հետ կապվելու համար գրեք Lilitarakelyan@pjc.am հասցեին:

Տեսանյութ
Print Friendly and PDF
Այլ մամլո հաղորդագրություններ
«Հեպատիտների տարածվածության, դեղերի և բուժման հասանելիության խնդիրները Հայաստանում»
16.08.2018
12:00
2017-2018 թթ. «Դրական մարդկանց հայկական ցանց» սոցիալական ՀԿ-ն իրականացրել է հետազոտություն Երևան, Գյումրի, Վանաձոր, Հրազդան, Սևան, Գավառ, Մարտունի և Արմավիր քաղաքներում`ուղղված բնակչության շրջանում վիրուսային հեպատիտներ B-ի և C-ի վաղ հայտնաբերմանը, խնդրի մասին քաղաքացիների շրջանում իրազեկության բարձրացմանը:
«ՀՀ պետական ֆինանսների կառավարման համակարգի 2017-2018թթ. մոնիտորինգի արդյունքները»
27.07.2018
12:30
Հուլիսի 27-ին «Մեդիա կենտրոնում» տեղի ունեցավ մամուլի ասուլիս «ՀՀ պետական ֆինանսների կառավարման համակարգի 2017-2018թթ. մոնիտորինգի արդյունքները» թեմայով։
Պաշտպանական ոլորտի պետգնումները կոռուպցիոն մեծ ռիսկեր են պարունակում՝ փորձագետ
26.07.2018
14:00
Հուլիսի 26-ին «Մեդիա կենտրոնում» Հանրային քաղաքականության հետազոտությունների ազգային կենտրոնի նախագահ, տնտեսագետ Արտակ Մանուկյանը ներկայացրեց ՀՔՀԱԿ-ի կողմից իրականացված 2017-2018 թթ. պաշտպանական ոլորտի գնումների մոնիտորինգի արդյունքները։
«Մեդիա-նոր իշխանություններ. մտահոգիչ միտումներ»
25.07.2018
12:00
Մանիպուլյացիա, քարոզչություն, ապատեղեկատվություն, կեղծ կայքեր..Այս ամենը մեդիայում եղել է միշտ: Սակայն մասշտաբները, որոնք տեսնում ենք այսօր, մեդիա փորձագետներին թույլ է տալիս վիճակը գնահատել՝ իբրև ճգնաժամային:

«Դիտորդների խմբի գործունեության խոչընդոտները և ՔԿՀ-ներում մարդու իրավունքների խախտումների ընթացիկ խնդիրները»
25.07.2018
11:00
Թավշյա հեղափոխությունից հետո ՀՀ Արդարադատության նախարարությունը պահում է նույն դիրքորոշումը և նույն կերպ խոչընդոտում ՀՀ ԱՆ ՔԿՀ-ներում հասարակական վերահսկողություն իրականացնող հասարակական Դիտորդների խմբի գործունեությունը. այս մասին հուլիսի 25-ին Մեդիա կենտրոնում տեղի ունեցած քննարկմանը հայտարարեցին Դիտորդական խմբի անդամները:
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Տեսանյութեր
Հայաստան-Թուրքիա Միջոցառումներ