Հեռարձակվող ԶԼՄ-ներում 2017թ. ԱԺ ընտրությունների լուսաբանման՝ մշտադիտարկման արդյունքները (մարտի 5-31)
04.04.2017
12:00
Ապրիլի 4-ին Մեդիա կենտրոնում տեղի ունեցավ մամլո ասուլիս «Հեռարձակվող ԶԼՄ-ներում 2017թ. ԱԺ ընտրությունների լուսաբանման՝ մշտադիտարկման արդյունքները (մարտի 5-31)» թեմայով:

Երևանի Մամուլի ակումբի նախագահ Բորիս Նավասարդյանը ներկայացրեց իրենց կազմակերպության կողմից իրականացված մշտադիտարկման ամփոփ արդյունքներն ու դրանց վերլուծությունը:

Բորիս Նավասարդյանը նախ նշեց, որ, ինչպես վկայում են միջազգային ու մասամբ նաև տեղական դիտորդական առաքելությունները, այս ընտրությունների ընթացքում ԶԼՄ-ների հետ կապված  դժգոհություններն ավելի պակաս են, քան նախորդ ընտրությունների ընթացքում:

«Ես կարող եմ ասել, որ հեռարձակվող լրատվամիջոցների առումով մենք մոտավորապես նույն իրավիճակն ունեինք, ինչ 2012 թ. խորհրդարանական և 2013 թ. նախագահական ընտրությունների ժամանակ: Այսինքն՝ արդեն 5 տարի առաջ մենք ունեցել ենք դրական զարգացումներ, որոնք պայմանավորված էին և՛ օրենսդրական փոփոխություններով, և՛ այն հանգամանքով, որ ՀՌԱՀ-ը մեր երկար տևած պահանջների արդյունքում նաև սկսեց մշտադիտարկել հեռարձակվող լրատվամիջոցներին: Մինչ այդ միայն միջազգային դիտորդներն ու մեր նման կազմակերպություններն էին դա անում, որը շատ քիչ շանս ուներ իրավական հետևանքների համար»,- իր խոսքում նշեց Բորիս Նավասարդյանը:

Բանախոսն ուշադրություն հրավիրեց այն հանգամանքի վրա, որ, չնայած զարգացող ինտերնետի ու ինտերնետային լրատվամիջոցների առկայությանը, Հայաստանում քաղաքացիների 80 տոկոսը շարունակում է հեռուստատեսությունը դիտարկել որպես տեղեկատվության հիմնական աղբյուր:  Ուստի ոլորտի որոշակի կարգավորումն ու այդ կարգավորման վերաբերյալ ուսումնասիրություններն անհրաժեշտ են: 

Հեռուստատեսության կարևորության փաստն ընդգծելու համար Բորիս Նավասարդյանը բերեց ապրիլի 2-ի ընտրությունների քարոզարշավի լուսաբանման ընթացքին վերաբերող ուշագրավ օրինակներ.

«Լևոն Տեր-Պետրոսյանը ո՛չ նախագահ լինելու ժամանակ, ո՛չ էլ քաղաքականությունից հեռանալուց հետո, ո՛չ էլ ընդդիմություն լինելու ընթացքում երբևէ հեռուստաընկերությունների տաղավարում հարցազրույց չի տվել: Այս ընտրությունների քարոզարշավի ժամանակ մենք փաստորեն տեսանք, որ նույն Տեր-Պետրոսյանը մեծ նշանակություն տվեց հեռուստատեսությանը և որոշեց երկու տաղավարային հարցազրույցի մասնակցել: Նույնը կարելի է ասել Գագիկ Ծառուկյանի համար, որը այս անգամ կրկին տաղավարային հարցազրույց տվեց»:

Հեռարձակվող ԶԼՄ-ների կողմից քարոզարշավի լուսաբանման ընթացքը մեկնաբանելիս բանախոսը շեշտեց քաղաքական ուժերի միջև դեբատների բացակայության հանգամանքը և նշեց, որ այս ուղղությամբ օրենսդրական կարգավորումներ են պետք, նույնիսկ կարող են օրենքով ամրագրել դեբատներին մասնակցելու անհրաժեշտությունը:

«Այն պետության համար, որը հավակնություններ ունի զարգանալ որպես ժողովրդավարական երկիր, բանավեճերի բացակայությունը դառնում է նյարդայնացնող: Խոսքը բոլոր դաշինքների առաջին համարների կամ վարչապետների թեկնածուների մակարդակով բանավեճերի մասին է: Կարծում եմ՝ եթե դա չի կայանում կամավոր եղանակով, պետք է գոնե մեկ դեբատի մասնակցությունը օրենքով սահմանել և ամրագրել այդ ավանդույթը»,- ասում է Նավասարդյանը:

ԵՄԱ-ի ղեկավարը նշեց, որ եթերի ժամանակի առումով հիմնականում հավասարակշռված լուսաբանում է եղել, սակայն պետք է հաշվի առնել ոչ միայն թվային տվյալները, այլ նաև բովանդակային մասը: Նրա խոսքով՝ բովանդակային մասի հետ կապված որոշ խնդիրներ, այնուամենայնիվ, կան:

«Նշանային բնութագրիչների քանակով, այսինքն՝ պոզիտիվ ու նեգատիվ լուսաբանելու առումով, ամենաշատ լուսաբանված կուսակցությունների մասով մենք ունենք միանգամայն տարբեր պատկեր: ՀՀԿ՝ 26 դրական, 47 բացասական, Ծառուկյան դաշինք՝ 36 դրական, 6 բացասական, 0 դրական, 12 բացասական՝ Կոնգրես-ՀԺԿ դաշինք, 16 դրական, 3 բացասական՝ ՀՅԴ:  Սա նշանակում է, որ եթերային ժամանակը կուսակցությունների ու դաշինքների համար կարող էր և՛  նպաստավոր, և՛ աննպաստ լինել՝ կախված նրանից՝ ինչպիսի՞ համատեքստում էին իրենք ներկայացվում»,- ասաց Նավասարդյանը:

Վերջինս նաև հավելեց, որ իրենք բավականին տագնապալի վիճակագրություն են արձանագրել քարոզարշավի լուսաբանման բովանդակային մասի հետ կապված:

«Մենք համեմատեցինք այս ընտրությունների մշտադիտարկման արդյունքները 2012 և 2013 թվականների համապետական ընտրությունների նշանային բնութագրիչներով լուսաբանման  տոկոսների համատեքստում: Եթե լուսաբանման ընդհանուր ծավալի մեջ 2012 թ. այդ տոկոսը կազմել էր 3,5 %, 2013 թ. էլ ավելի ցածր թիվ էր արձանագրվել՝ 2,2 %, այսինքն՝ ընդհանուր քարոզչության լուսաբանումը եթերում չեզոք էր, ապա այս անգամ այդ տոկոսը բարձրացել է՝ հասնելով 6,5-ի: Այսպիսի տոկոս մենք վաղուց չենք ունեցել, այդպիսի թվեր մենք ունեցել ենք 2007 թ., 2008 թ. համապետական ընտրությունների ժամանակ: Վիճակագրական այս տվյալը որոշ անհանգստություն է պատճառում, քանի որ եթե մենք համեմատում ենք այլ երկրներում համապատասխան ուսումնասիրությունների հետ, ապա նորմալ համարվում է մինչև 5%-ը: Եթե 5-ից անցնում է, դա նշանակում է, որ պայքարն ավելի նյարդային է, և դա արտացոլվում է եթերում»,- նշեց Նավասարդյանը:

Երևանի Մամուլի ակումբի ղեկավարը մտահոգիչ համարեց այն պրակտիկան, որ միևնույն նկարահանումն օգտագործել են տարբեր հեռուստաալիքներ: Բանախոսն այդ հանգամանքը բացատրեց նաև ռեսուրսների անբավարարությունով: Հեռուստաընկերությունները փոխանակել են նկարահանած տեսանյութերը՝ առանց նշելու, թե որ հեռուստաալիքի տեսանյութն են օգտագործում:

Մամլո ասուլիսի շարունակությունը դիտեք այստեղ:

 

Տեսանյութ
Print Friendly and PDF
Այլ մամլո հաղորդագրություններ
«Մարտահրավերներ, խոչընդոտներ և ձեռքբերումներ 26-ամյա անկախության ճանապարհին»
20.09.2017
11:00
Սեպտեմբերի 20-ին «Մեդիա կենտրոնում» (հասցե`Սարյան 12, 3-րդ հարկ) տեղի ունեցավ քննարկում` նվիրված ՀՀ Անկախության տոնին «Մարտահրավերներ, խոչընդոտներ և ձեռքբերումներ 26-ամյա անկախության ճանապարհին» թեմայով:
«Ժողովրդավարության միջազգային օր. ժողովրդավարության հաստատման խոչընդոտներն ու մարտահրավերները Հայաստանում»
15.09.2017
12:00
Սեպտեմբերի 15-ին «Մեդիա կենտրոնում» տեղի ունեցավ Ժողովրդավարության միջազգային օրվան նվիրված հարցազրույց Հայաստանի Հելսինկյան կոմիտեի նախագահ Ավետիք Իշխանյանի հետ` «Ժողովրդավարության հաստատման խոչընդոտներն ու մարտահրավերները Հայաստանում» թեմայով:
Խավարում ցուցահանդեսի հարկադիր կասեցում. որոշման դրդապատճառների գնահատում ու քննարկում
14.09.2017
12:00
Սեպտեմբերի 14-ին Մեդիա կենտրոնում տեղի ունեցած քննարկումը ««Խավարում» ցուցահանդեսի հարկադիր կասեցման և որոշման դրդապատճառների շուրջ էր:
«Ինչի՞ համար է վճարում ուսանողը Հայաստանում. բարձրագույն կրթության համակարգային խնդիրները»
14.09.2017
11:00
Հայաստանի բարձրագույն կրթության ոլորտում անհրաժեշտ են կտրուկ և համակարգային բարեփոխումներ: Այս կարծիքին են կրթության ոլորտի փորձագետները, որոնք սեպտեմբերի 14-ին մասնակցեցին «Մեդիա կենտրոնում» կազմակերպված քննարկմանը` «Ինչի՞ համար է վճարում ուսանողը Հայաստանում. բարձրագույն կրթության համակարգային խնդիրները» թեմայով:
«Հայաստանում բժշկական պարտադիր ապահովագրության ներդրման անհրաժեշտությունն ու խնդիրները»
13.09.2017
12:00
Մարդկային զարգացման միջազգային կենտրոնը զեկույց էր հրապարակել Հայաստանում բժշկական պարտադիր ապահովագրություն ներդնելու անհրաժեշտության ու այդ գործընթացին առնչվող խոչընդոտների վերաբերյալ։
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Տեսանյութեր
Մամլո հաղորդագրություն
Հայաստան-Թուրքիա Միջոցառումներ