«Ընտրությունների նախաքարոզչական փուլը Հայաստանի օնլայն մեդիայում և ֆեյսբուքյան հարթակներում. նոր զեկույցի ներկայացում»
07.03.2017
11:00
Այսօր Մեդիա կենտրոնում «Ռեգիոն» հետազոտական կենտրոնը ներկայացրեց «Ընտրությունների նախաքարոզչական փուլը Հայաստանի օնլայն մեդիայում և ֆեյսբուքյան հարթակներում» նոր զեկույցի տվյալները:

Զեկույցի շրջանակում անդրադարձ է կատարվել փետրվարի 15-ից մարտի 1-ը ընտրություններին մասնակցող քաղաքական ուժերի կողմից ստեղծված ֆեյսբուքյան  նախընտրական հարթակներին և նրանց ծավալած քարոզչական գործունեությանը, ինչպես նաև 7 օնլայն ԶԼՄ-ների կողմից նախաքարոզչական փուլի լուսաբանման առանձնահատկություններին:

«Ռեգիոն» հետազոտական կենտրոնի տնօրեն Լաուրա Բաղդասարյանն ասաց, որ2012-ից սկսած ֆեյսբուքը որպես գործիք մտել է ընտրական գործընթացի մեջ և ընտրազանգվածը դարձել է քարոզչության շատ ակտիվ մասնակից:

«Մինչև 2012 թվականը, ընտրազանգվածը հանդես էր գալիս որպես լսարան, որի վրա ներգործում են, որի արդյունքում նա պետք է կատարեր իր ընտրությունը, այս պարագայում սոցիալական ցանցերի միջոցով ընտրողներն էլ սկսեցին քարոզել, կարծիք հայտնել, քննարկել ու  դարձան  գործող անձինք»,-ասաց Բաղդասարյանը:

Ուսումնասիրության համար առցանց լրատվամիջոցներից ընտրվել են 7-ը՝ aravot.am, lragir.am, 1in.am, 168.am, news.am, tert.am, armlur.am: 

Ընտրության սկզբունքը եղել է կայքերի բարձր դիտելիությունը: Բաղդասարյանը նշում է, որ այս կայքերը օրական թողարկում են 200-300 միավոր նյութ, իսկ ամսվա կտրվածքով ունենում են 10 միլիոնի հասնող հաճախումներ:

«Նախաքարոզչական  փուլում ընտրությունների մասին նյութերը որոշ կայքերում օրական կազմել է 25 տոկոս, որոշ կայքերում էլ՝ 12 տոկոս: Նախաքարոզչական շրջանի համար սա նորմալ ակտիվություն է»,- ասում է Բաղդասարյանը և հավելում  որ քարոզչական շրջանում կրկնակի և եռակի անգամ մեծանալու են ընտրությունների մասին նյութերի ծավալները:

Ըստ Բաղդասարյանի՝ այս ընթացքում տեղի են ունեցել բախումներ քարոզչական մակարդակում, մեդիայում՝ կապված Սեյրան Օհանյանի, բանակում կոռուպցիայի թեմայի, Վարդան Ոսկանյանի որդու ձերբակալման հետ:

«Նախաքարոզչական փուլում նախընտրական գործընթացի վերաբերյալ նյութերում շատ է եղել անդրադարձ ընտրակաշառքներին: Առաջադրված բոլոր քաղաքական ուժերը խոսել են ընտրակաշառքի մասին, խոսել են թե ինչ տեսակի ընտրակաշառքներ են բաժանվում, ինչ գումարի մասին է խոսքը: Խոսել են անգամ հեռախոսներ բաժանելու, 100 դոլարներ բաժանելու, հարևանների տներով շրջելու ու ցուցակագրելու մասին»,-ասաց Բաղդասարյանը:

Նա ընդգծում է, որ սա առաջին ընտրությունն է, որտեղ քարոզչության ժամանակ մեծ տեղ է հատկացվում ղարաբաղյան հարցին ու բանակին:

«Չի եղել որևէ  ընտրություն որի ժամանակ այսքան ուշադրության դարձվի Ղարաբաղի հարցին: Սա ունի իր պատճառները և կապված է  նրա  հետ, որ Օհանյանը եղել է ՊՆ նախարար, հիմա անցել է ընդդիմադիր քաղաքական դաշտ և անընդհատ առաջ է մղում մեր երկրի անվտանգության թեզը»,-ասում է Բաղդասարյանը:

Ըստ զեկույցի ցուցանիշների՝ բոլոր քաղաքական ուժերն էլ քննադատել են մեկը մյուսին, ինչը, ըստ Բաղդասարյանի, բնական և նորմալ է մրցակցության պայմաններում:

 «Շատ չի տարբերվել նախաքարոզչական փուլը նախորդ նախընտրական գործընթացներից, մենք ունեցանք դեպքեր, օրինակ՝ բախումների, ծեծի անգամ նույն կուսակցությունների ներկայացուցիչների միջև, ինչը արտառոց է նախորդ ընտրություների համեմատ: Սա պայմանավորված է նրանով, որ ամեն ինչ կազմակերպվում է նոր Ընտրական օրենսգրքի շուրջ և այստեղ խաղի կանոնները փոխված են»,-ասում է Բաղդասարյանը:

 Անդրադառնալով ընտրազանգվածի արձագանքներին՝ Բաղդասարյանը ընդգծեց, որ առավելագույն հավանության, տարածման և մեկնաբանությունների են արժանացել 1in.am, lragir.am, aravot.am լրատվամիջոցների նյութերը ընտրությունների թեմայով:

«Կարդացվածության մաքսիմալ ցուցանիշները հասել են 28 հազարի մեկ առանձին միավոր նյութի համար»,- ընդգծեց Բաղդասարյանը:

Քաղաքական ուժերի ֆեյսբուքյան հարթակների առնչությամբ «Ռեգիոն» հետազոտական կենտրոնը հարցումներ է  ուղղել 9 առաջադրված ուժերին , որոնցից 8-ն են պատասխանել՝ ի բացառություն «Հայկական վերածնունդ» կուսակցության:    

«Մենք դիմել ենք քաղաքական ուժերին հարցով, թե ինչ միջոցներ են կիրառելու քարոզչության ժամանակ: Արդյոք օգտագործելու՞ են ֆեյսբուքը, օֆլայն հանդիպումները, անհատական հանդիպումները, պաստառների, բուկլետների տրամադրումը, դեմ առ դեմ հանդիպումները: Բացի ԵԼՔ-ից բոլոր պատասխանել են, որ օգտագործելու են բոլոր միջոցները: ԵԼՔ-ը ասաց, որ օգտագործելու են անվճար եթերը, քանի որ ունեն ֆինանսական խնդիր, անգամ դրամահավաք կազմակերպեցին: Բացի վճարովի եթերից ԵԼՔ-ն էլ օգտագործում է ֆեյսբուքյան միջոցները: Մրցակից ուժերը ֆեյսբուքը համարում են կարևոր հարթակ իրենց քարոզչությունը առաջ տանելու համար»,-ասում է Բաղդասարյանը:

 Հարցմանը ի պատասխան՝ ՀԱԿ-ՀԺԿ դաշինքը նույնպես նշել է, որ քարոզչության տեսանկյունից ֆեյսբուքյան հարթակները չափազանցած կարևոր են և այդ կերպ հնարավոր է թիրրախավորել ընտրազանգվածները:  

«ՀՀԿ-ն ասել է, որ այստեղ կա մեծ ընտրազանգված ու հնարավոր է կոնտակտի մեջ մտնել երիտասարդության հետ, տեղյակ պահել նաև սփյուռքի ներկայացուցիչներին,  ինտերակտիվ շփումների հնարավորություն տալ: Առաջին անգամ է ՀՀԿ-ի քարոզչական պատմության մեջ, որ ՀՀԿ-ն էջ բացեց ֆեյսբուքում իր քարոզչությունը առաջ մղելու համար»,-ասում է Բաղդասարյանը և ընդգծում, որ ֆեյսբուքում այսօր գրանցված է 1 միլիոն հայաստանցի, որոնց 99 տոկոսը պոտենցիալ ընտրողներ են:

Նա ընդգծում է, որ բոլոր քաղաքական ուժերը իրենց պատասխաններում կարևորել են ֆեյսբուքյան գործիքները քարոզչության համար:  

Բաղդասարյանը նշում է նաև, որ անհատ թեկնածուների էջերի հետևորդները ավելի շատ են քան կուսակցությունների, դաշիքնների ֆեյսբուքյան էջերինը:

«Օրինակ շատ են Նիկոլ Փաշինյանի, Րաֆֆի Հովհաննիսյանի, Սեյրան Օհանյանի էջերի հետևորդները: Ֆեյսբուքում շատ ակտիվ են Ստեփան Սաֆարյանը, Վահե Էնֆիաջյանը,  Հրանտ Բագրատյանը: Բավական կրեատիվ մոտեցում է ցուցաբերում ԵԼՔ-ը, որտեղ նրանք պատասխանում են ֆեյսբուքյան օգտատերերի՝ իրենց ուղղած հարցերին: Նիկոլ Փաշինյանը այդեպս ինքնասուլիս է կազմակերպում, պատասխանում օգտատերերի հարցերին և օգտագործում ֆեյսբուքի ամբողջ գործիքակազմը»,-ասում է Բաղդասարյանը:

Նշենք նաև, որ «Ռեգիոն »հետազոտական կենտրոնը «Հայաստանի օնլայն մեդիան և ֆեյսբուքյան հարթակները 2017թխորհրդարանական ընտրություններում» թեմայով հետազոտությունն իրականացվում է Եվրոպական հիմնադրամ հանուն ժողովրդավարության կազմակերպության օժանդակությամբ (EED):

Նման հետազոտություն կանցկացվի նաև քարոզչական փուլում, որի արդյունքները կամփոփվեն ընտրություններից հետո:

Ասուլիսի շարունակությունը դիտեք այստեղ:

 

 

Տեսանյութ
Print Friendly and PDF
Այլ մամլո հաղորդագրություններ
«Քաղաքացի դիտորդ» նախաձեռնության մամուլի ասուլիսը
27.03.2017
12:00
Մարտի 27-ին «Մեդիա կենտրոնում» տեղի ունեցավ «Քաղաքացի դիտորդ» նախաձեռնության մամուլի ասուլիսը, որի ընթացքում ներկայացվեց դիտորդական առաքելության նախապատրաստական աշխատանքներն ու ԱԺ ընտրությունների ժամանակ ընտրախախտումների բողոքարկման համակարգը:
«Նախընտրական պայքար. ի՞նչ լուծումներ են առաջարկում քաղաքական ուժերը Արմավիրի մարզի խնդիրների համար
25.03.2017
12:00
Մարտի 25-ին «Մեդիա կենտրոնը» Արմավիրի Զարգացման Կենտրոնի հետ համատեղ անցկացրեց քննարկում Արմավիր քաղաքում (հասցե՝ ք. Արմավիր, Շահումյան 68ա) «Նախընտրական պայքար. ի՞նչ լուծումներ են առաջարկում քաղաքական ուժերը Արմավիրի մարզի խնդիրների համար» թեմայով:
«Կրթության ոլորտի խնդիրները նախընտրական ծրագրերում»
24.03.2017
12:00
Մարտի 24-ին Մեդիա կենտրոնում տեղի ունեցավ քննարկում «Կրթության ոլորտի խնդիրները նախընտրական ծրագրերում» թեմայով:
«Տնտեսական խնդիրները նախընտրական ծրագրերում, նոր լուծումնե՞ր, թե՞ հին մոտեցումներ»
23.03.2017
20:00
Մարտի 23-ին «Մեդիա կենտրոնի» նախաձեռնությամբ «Ա1+»-ի հեռուստատաղավարում առցանց ուղիղ հեռարձակմամբ անցկացվեց բանավեճ «Տնտեսական խնդիրները նախընտրական ծրագրերում, նոր լուծումնե՞ր, թե՞ հին մոտեցումներ» թեմայով:
«Ի՞նչ փոփոխություններ են առաջարկում քաղաքական ուժերը Սյունիքի մարզում»
23.03.2017
12:00
Ընտրապայքարին մասնակից քաղաքական ուժերը եւ դաշինքները թե՛ հանրապետական, եւ թե՛ տեղական մակարդակներում իրենց ծրագրային դրույթներում եւ նախընտրական խոստումներում հիմնականում շեշտը դնում են կոռուպցիայի նվազեցման, անվտանգության ու սոցիալ-տնտեսական խնդիրների լուծման վրա:
Միանալ մեզ սոց․ ցանցերում
ՄԻՋՈՑԱՌՈՒՄՆԵՐԻ ԳՐԱՆՑՈՒՄ
Ծառայություններ
Այսօր մեդիա կենտրոնում
Տեսանյութեր
Մամլո հաղորդագրություն
Միջոցառում
Հայաստան-Թուրքիա Միջոցառումներ